Grunnnámskeiðinu í gítarleik, sem haldið var í Hafnarfirði 5. til 26. maí, er nú lokið og tókst það vægast sagt vel. Námskeiðið seldist upp og það var ótrúlega gaman að sjá þennan fjölbreytta hóp stilla saman strengi. Stemningin var hreinlega frábær frá fyrsta degi til þess síðasta!
Það sem gladdi mig sérstaklega við þennan hóp var að meðalaldurinn var í kringum 50 ár. Margir mættu til að dusta rykið af gítarnum eftir langt hlé, aðrir voru að stíga sín alveg fyrstu skref og sumir voru loksins að láta gamlan draum rætast eftir að hafa beðið eftir „rétta tímanum“. Þetta sýndi okkur svart á hvítu að það er aldrei of seint að byrja.
Markmiðið með námskeiðunum okkar er einmitt að gera gítarleik aðgengilegan og skemmtilegan – án pressu og án krafna um tónlistargrunn. Við tókum þetta á rólegu nótunum, fórum yfir helstu hljómana, fundum taktinn og spiluðum einföld lög saman. mikil áhersla var lögð á uppbyggingu tónlistar, mismunandi takttegundir og hvernig tónlist virkar í raun. Aðalatriðið er alltaf að fólk fái sjálfstraust til að taka upp gítarinn heima í stofu og njóta þess að spila, og þessi hópur fór klárlega með það nesti heim.
Vegna mikillar eftirspurnar stefnum við á fleiri námskeið í Hafnarfirði, bæði í sumar og haust. Fylgstu með hér á gitarskolinn.is (eða skráðu þig á póstlistann okkar) til að missa ekki af næstu skráningu!
